'कोशीको पानी' बाट सुरु भएको कन्सर्ट 'रातो र चन्द्रसुर्जे' मा सकियो

मलेसिया। नेपाली लोकरक ब्यान्ड नेपथ्यले मलेसियाको राजधानी क्वालालम्पुरमा भव्य साङ्गीतिक प्रस्तुति दिएको छ। आफ्नो साढे तीन दशक लामो साङ्गीतिक यात्रामा नेपथ्य पहिलोपटक मलेसियामा प्रस्तुत भएको हो।

पर्यटकीय स्थल बुकित बिन्ताङस्थित ‘जेप हल’ मा आइतबार बेलुकी ठीक ७ बजे नेपथ्यले ‘कोशीको पानी’ गीतबाट कन्सर्ट सुरु गरेको थियो। एकपछि अर्को गीत प्रस्तुत गर्ने क्रममा नेपथ्यका गायक अमृत गुरुङले दर्शकसँग संवाद गर्दै देशप्रेमका सन्देश पनि प्रवाह गरे।

गीत सङ्कलनका क्रममा अनेक स्थान पुग्दा नेपाललाई नजिकबाट चिन्ने अवसर पाएको सुनाउँदै उनले स्वदेश पुगेका बेला ती स्थान घुम्न दर्शकलाई आह्वान गरे।

कन्सर्ट हेर्न दर्शक लहरमा सिङ्गापुरदेखि रेस्टुरेन्ट व्यवसायी पदम थापा पनि आइपुगेका थिए। नेपालका सबै भेगको संस्कृति समेटिने गीत-सङ्गीतसँग झुम्न पाइएको र फरक-फरक पुस्ताको रुचि पनि एकै ठाउँमा अटाएको महसुस भएको प्रतिक्रिया दिँदै उनले नेपथ्यको स्वाद लिनकै निम्ति टाढाको यात्रा गरेर आएको बताए।

राम्रो तयारी र उत्कृष्ट व्यवस्थापनका कारण कन्सर्ट उच्च स्तरको बनेको उनले थपे। केही वर्षयता वैदेशिक रोजगारीका लागि प्रमुख गन्तव्य बन्दै आएको मलेसियामा नेपाली कामदारको सङ्ख्या दिनप्रतिदिन बढ्दै गएको छ।

नेपथ्यका लागि साङ्गीतिक प्रस्तुतिका हिसाबले मलेसिया २० औँ मुलुक हो भने क्वालालम्पुर ५८ औँ विदेशी सहर हो। कन्सर्टमा मलेसियास्थित नेपाली दूतावासकी उपप्रमुख (चार्ज डि अफेयर्स) मुदिता बज्राचार्यको पनि उपस्थिति थियो।

क्वालालम्पुरमा नेपथ्य अनुभव गर्न पाउँदा असाध्यै खुसी लागेको बताउँदै उनले कन्सर्टमा रमाउँदै गर्दा आफ्नै पाराका शब्द र धुनहरूको शक्तिले बारम्बार पुराना दिन सम्झाएको र विविधताको आनन्द पनि महसुस गर्न पाइएको उल्लेख गरिन्।

विदेशी भूमिमा रहेर कूटनीतिक सेवा गरिरहँदा नेपथ्यजस्तो ब्यान्डको स्तरीय प्रस्तुति र गायक अमृतले बीच-बीचमा दिने देशप्रेमका सन्देशहरूका कारण गौरव र आत्मसम्मान बढेको अनुभव भएको पनि उनले सुनाइन्।

दर्शक घेराबीच क्वालालम्पुरस्थित लिङ्कन विश्वविद्यालयमा दुई वर्षदेखि अध्ययनरत सिमरन सेढाईं पनि थिइन्। अमृत गुरुङको नजिकै रहेर नेपथ्य कन्सर्ट हेरेको यो अनुभव आफूलाई सपनाजस्तो लागिरहेको बताउँदै उनले बाल्यकालमा आफूलाई सङ्गीतको तालिम लिने मौका जुराएको अनुभव साटिन्। दुई घण्टा लामो कन्सर्टको अन्त्य ‘रातो र चन्द्रसुर्जे’ गीतबाट गरिएको थियो।

कन्सर्ट आयोजनास्थल ‘जेप क्वालालम्पुर’ अन्तर्राष्ट्रिय स्तरको रङ्गमञ्च तयार पार्ने जापानस्थित ‘जेप समूह’ कै विस्तार थियो। त्यसका निर्देशक सिनिचिरो होन्डाका निम्ति पनि यो पहिलो नेपाली कार्यक्रमको अनुभव बन्न पुग्यो।

यस ब्यान्डले नेपाली मौलिकतालाई समातेर वैश्विक स्वादमा गीत पस्कँदो रहेछ भन्दै कन्सर्ट हेरिसकेपछि होन्डाले सङ्गीतदेखि लिएर व्यवस्थापनसम्म सिङ्गो प्रस्तुति स्तरीय महसुस गरेको बताए।

मलेसियाको फरक दर्शक घेरालाई नेपथ्यसँग नजिक्याउन जिम्मेवारी सम्हालेका स्थानीय आयोजकले पनि कार्यक्रमबाट सन्तुष्टि मिलेको प्रतिक्रिया दिए। स्थानीय आयोजक ‘आर्बिटरी इभेन्ट्स’ का विपिन नकर्मीले ब्यान्डको प्रस्तुति सोचेभन्दा गहकिलो महसुस गरेको र जे जति दर्शक आए पनि सबै मिठो सम्झना बोकेर गएको देख्दा आनन्द लागेको बताए।

मञ्चमा अमृतलाई ड्रमसेटमा ध्रुव लामा, बेस गितारमा सुविन शाक्य, गितारमा नीरज गुरुङ, मादलमा शान्ति रायमाझी र किबोर्डमा दिनेशराज रेग्मीले सघाएका थिए। मलेसियामा आयोजित यो एक मात्र कन्सर्ट सकिएपछि ब्यान्ड स्वदेश फर्किएको छ।

सम्बन्धित खबर

क्यानाडा २०२७ को युरोभिजन संगीत प्रतियोगितामा सहभागी हुने

'कन्दरा' ले उत्तर अमेरिका सङ्गीतमय बनाउने, सुरुवात क्यानाडाबाट

छोराको सांगीतिक प्रस्तुतिमा सोफी र मार्गरेट ट्रुडोको दुर्लभ उपस्थिति, जष्टिनले दिए बधाई