'क्यानाडामा खुसी रहन वार्षिक १५५,८५० डलर आम्दानी आवश्यक पर्ने'

अन्टारियो । क्यानाडामा वित्तीय रूपमा पूर्ण रूपमा सन्तुष्ट र आर्थिक तनावमुक्त जीवन बिताउन एक व्यक्तिलाई वार्षिक रूपमा औसत १५५,८५० क्यानेडियन डलर (प्रतिव्यक्ति) आम्दानी आवश्यक पर्ने अनुसन्धानले देखाएको छ। वित्तीय सेवा प्रदायक संस्था रेमिट्लीले सार्वजनिक गरेको यो अध्ययनअनुसार विश्वभर खुसी वा जीवन सन्तुष्टि प्राप्त गर्न लाग्ने लागतका आधारमा क्यानाडा १४ औँ महँगो देश बनेको छ।

यो नयाँ तथ्याङ्क सन् २०१८ मा अमेरिकी पर्ड्यू विश्वविद्यालयका अनुसन्धानकर्ताहरूले आय र व्यक्तिगत जीवनप्रतिको सन्तुष्टिबीचको सम्बन्धबारे गरेको वैज्ञानिक अध्ययनमा आधारित छ। पर्ड्यूको सिद्धान्तअनुसार मानिसको आम्दानी एउटा निश्चित विन्दुमा पुगेपछि थप हुने पैसाले उसको दैनिक जीवन सन्तुष्टिमा ठूलो प्रभाव पार्दैन, जसलाई 'आम्दानीको तृप्ति विन्दु' (इनकम सेसिएसन पोइन्ट) भनिन्छ। रेमिट्लीले अन्तर्राष्ट्रिय मुद्रा कोषको क्रयशक्ति अनुपात र हालैको उच्च मुद्रास्फीतिलाई समायोजन गर्दै यो अद्यावधिक तथ्याङ्क निकालेको हो।

अध्ययनले यो रकम परिवार वा घरायसी आम्दानी नभई एक जना व्यक्तिको व्यक्तिगत वार्षिक आम्दानी भएको स्पष्ट पारेको छ। यसले न्यूनतम जीवनयापन खर्च वा बाँच्नका लागि चाहिने रकमलाई नभई घरभाडा, बचत, भविष्यको सुरक्षा, ऋण र मनोरञ्जनजस्ता कुनै पनि विषयमा आर्थिक चिन्ता नहुने विन्दुलाई मापन गरेको छ।

क्यानाडाका विभिन्न शहरहरूमा खुसीका लागि चाहिने यस्तो व्यक्तिगत आम्दानी फरक-फरक पाइएको छ। ब्रिटिस कोलम्बियाको भिक्टोरिया शहरमा जीवन सन्तुष्टिका लागि वार्षिक करिब १६९,९५१ क्यानेडियन डलर आम्दानी आवश्यक पर्ने देखिएको छ, जुन देशकै सबैभन्दा उच्च हो। त्यसैगरी टोरन्टो र भ्यान्कुभरमा आर्थिक रूपमा निश्चिन्त हुनका लागि वार्षिक १६६,९८२ डलर आम्दानी चाहिने अध्ययनमा उल्लेख छ।

त्यस्तै सस्काटुनमा १५९,८०८ डलर, क्याल्गरीमा १५९,५६१ डलर, हलिफ्याक्समा १५६,५९२ डलर, ओटावामा १५२,६३४ डलर र मन्ट्रियलमा १४८,१८१ डलर आम्दानीको सीमा तोकिएको छ। अध्ययनमा समेटिएका १९ प्रमुख क्यानेडियन शहरहरूमध्ये अन्टारियोको किङ्स्टन शहरमा सबैभन्दा कम अर्थात् करिब १४०,५१३ डलर आम्दानीले खुसीको विन्दु छुने बताइएको छ।

अन्तर्राष्ट्रिय स्तरमा तुलना गर्दा विश्वमै खुसी रहन सबैभन्दा धेरै रकम चाहिने देशको सूचीमा आइसल्यान्ड पहिलो स्थानमा छ, जहाँ प्रतिव्यक्ति वार्षिक १६३,५७९ अमेरिकी डलर आवश्यक पर्छ। त्यसपछि अस्ट्रेलिया, स्विट्जरल्यान्ड, न्युजिल्यान्ड र अमेरिका अगाडि छन्। क्यानाडा यो सूचीमा फिनल्यान्ड र अस्ट्रियाभन्दा मुनि तथा बेल्जियम र आयरल्यान्डभन्दा माथि परेको छ।

अनुसन्धानका अनुसार क्यानाडालीहरूको वर्तमान औसत आम्दानीले खुसीका लागि आवश्यक पर्ने कुल रकमको करिब ४४.४ प्रतिशत मात्र ओगट्छ। क्यानाडामा बसोबास गर्ने नेपालीसहितका आप्रवासी समुदायका लागि घरभाडा, उपभोग्य वस्तु र दैनिक महँगी बढिरहेको वर्तमान अवस्थामा यो तथ्याङ्कले आर्थिक चिन्तामुक्त हुन चाहिने मापदण्डलाई उजागर गरेको छ।

सम्बन्धित खबर

टोरन्टोको बिली बिशप विमानस्थल विस्तारमा अटवाको रोक

५ अर्ब डलरको ठेक्का अन्तिम चरणमा: ब्राम्पटनको गाडी निर्माता अटाउने सम्भावना

ट्रम्पको महसुल धम्कीविरुद्ध प्रिमियरहरुको दबाबः प्रधानमन्त्री कार्नीसँग स्पष्ट योजना माग