क्यानाडाका दुई प्रान्तमा आधाजसो कामदारको आम्दानी जीवनयापनका लागि अपर्याप्त

अन्टारियो। क्यानाडाका नोभा स्कोटिया र न्युफाउन्डल्यान्ड एन्ड ल्याब्राडोर प्रान्तमा करिब आधा कामदारको आम्दानी आधारभूत खर्च धान्न आवश्यक रकमभन्दा कम रहेको एक नयाँ प्रतिवेदनले देखाएको छ।

क्यानेडियन सेन्टर फर पोलिसी अल्टरनेटिभ्सले सार्वजनिक गरेको प्रतिवेदनअनुसार प्रिन्स एडवर्ड आइल्यान्ड, नोभा स्कोटिया र न्युफाउन्डल्यान्ड एन्ड ल्याब्राडोरमा यस वर्ष जीवनयापनका लागि आवश्यक न्यूनतम प्रतिघण्टा आम्दानी बढेको छ।

प्रतिवेदनले तीनै प्रान्तका सरकारलाई न्यूनतम ज्याला बढाउन आग्रह गरेको छ। हालको न्यूनतम ज्याला जीवनयापनका लागि आवश्यक गणना गरिएको रकमभन्दा निकै कम छ।

प्रतिवेदनका अनुसार जीवनयापन ज्याला भनेको परिवारले वर्षभरिका आधारभूत खर्च धान्न आवश्यक पर्ने प्रतिघण्टा आम्दानी हो। दुई वयस्कले पूर्णकालीन काम गर्ने र दुई साना बालबालिका भएको परिवारलाई आधार मानेर यसको गणना गरिएको छ।

तीन प्रान्तमध्ये नोभा स्कोटियामा जीवनयापन ज्याला र न्यूनतम ज्यालाबीचको अन्तर सबैभन्दा ठूलो छ। त्यहाँ न्यूनतम ज्याला आवश्यक रकमभन्दा करिब १२ डलर कम छ।

प्रतिवेदनका सहलेखक क्रिस्टिन साउल्नियरले न्यूनतम ज्याला निर्धारण गर्दा जीवनयापन ज्यालालाई आधार बनाउनुपर्ने बताइन्।

नोभा स्कोटियाको श्रम विभागका प्रवक्ताले भने सरकारले न्यूनतम ज्याला निरन्तर बढाउँदै आएको बताएका छन्। उनका अनुसार सन् २०२१ मा प्रतिघण्टा १२ डलर ९५ सेन्ट रहेको न्यूनतम ज्याला बढेर अहिले १७ डलर पुगेको छ।

यस अवधिमा ३० प्रतिशतभन्दा बढी वृद्धि भएको विभागको भनाइ छ। तर साना व्यवसायमा पर्ने असरलाई पनि ध्यान दिनुपर्ने र ज्याला वृद्धि अनुमानयोग्य तथा दिगो हुनुपर्ने विभागले जनाएको छ।

प्रतिवेदनअनुसार तीनै प्रान्तमा आवास, यातायात र इन्धनको बढ्दो खर्चले जीवनयापन ज्याला बढाएको छ। तथ्याङ्क क्यानाडाले गरिबीको आधिकारिक रेखा तथा खाद्यान्न, लत्ताकपडा र यातायातको लागत गणना गर्ने तरिकामा गरेको परिवर्तनले पनि यस वर्षको दरमा प्रभाव पारेको साउल्नियरले बताइन्।

तीन प्रान्तमध्ये न्युफाउन्डल्यान्ड एन्ड ल्याब्राडोरको ल्याब्राडोर-नर्दर्न पेनिन्सुला क्षेत्रमा जीवनयापन ज्याला प्रतिघण्टा ३० डलर ५० सेन्ट पुगेको छ। यो पहिलोपटक नोभा स्कोटियाको ह्यालिफ्याक्सको ३० डलरभन्दा बढी हो।

ल्याब्राडोरमा खाद्यान्नको लागत आवास खर्चभन्दा पनि बढी रहेको साउल्नियरले बताइन्। त्यहाँ खाद्यान्न किन्नसमेत परिवारलाई कठिनाइ भइरहेको उनको भनाइ छ।

नोभा स्कोटियाको उत्तरी क्षेत्रमा जीवनयापन ज्यालामा सबैभन्दा ठूलो वृद्धि भएको छ। प्रतिवेदनले यसको मुख्य कारण भाडा बढ्नु रहेको जनाएको छ। ह्यालिफ्याक्सबाट करिब एक घण्टा उत्तरमा पर्ने ट्रुरोमा सन् २०२६ मा भाडा ३२ प्रतिशत बढेको साउल्नियरले बताइन्।

ह्यालिफ्याक्समा घरभाडा महँगिएपछि केही मानिस अन्य क्षेत्रमा बसाइँ सर्न थालेकाले पनि आसपासका क्षेत्रमा दबाब परेको हुन सक्ने उनको भनाइ छ।

नोभा स्कोटिया फेडेरेसन अफ लेबरकी अध्यक्ष मेलिसा मार्सम्यानले जीवनयापनको बढ्दो लागत नियन्त्रण गर्न सरकारले अझै काम गर्नुपर्ने बताइन्। विशेषगरी ग्रामीण क्षेत्रमा भाडा बढिरहेको अवस्थामा सरकारले गैरबजार आवासमा लगानी गर्नुपर्ने उनको सुझाव छ।

ह्यालिफ्याक्सस्थित ब्रिजेज टु होप खाद्य बैंककी कार्यकारी निर्देशक लेस्ली बर्गेसका अनुसार यस वर्ष खाद्य बैंकमा सहयोग माग्नेको संख्या अघिल्लो वर्षको तुलनामा २० प्रतिशत बढेको छ। अपर्याप्त आम्दानी र आधारभूत वस्तुको बढ्दो मूल्यले मानिसलाई खाद्य बैंकमा निर्भर हुन बाध्य बनाएको उनले बताइन्।

उनका अनुसार खाद्य बैंकले सामान्यतया आपत्कालीन अवस्थामा केही दिनका लागि खाद्यान्न उपलब्ध गराउने हो, तर अहिले धेरै परिवारको नियमित आम्दानीले नै आधारभूत खर्च धान्न सकेको छैन।

बर्गेसले आय सहायता र रोजगारी बिमा कार्यक्रमको दायरा बढाएर सरकारले परिवारलाई सहयोग गर्न सक्ने बताइन्।

प्रतिवेदनमा न्यु ब्रन्सविक प्रान्तको जीवनयापन ज्याला समावेश गरिएको छैन। उक्त प्रान्तको जीवनयापन ज्यालासम्बन्धी अध्ययन र प्रतिवेदन सार्वजनिक गर्ने जिम्मेवारी ह्युमन डेभलपमेन्ट काउन्सिलको रहेको छ।

सम्बन्धित खबर

क्यानाडामा सबैभन्दा धेरै चोरी हुने सवारीसाधन होन्डा सीआर-भी

क्यानाडाका पुर्व प्रधानमन्त्री ट्रुडो अक्सफोर्ड विश्व विद्यालयसँग आवद्ध

नियन्त्रित औषधिसम्बन्धी नयाँ नियमबारे 'हेल्थ क्यानाडा'को मार्गदर्शन