• शनिबार, ६ मङ्सिर, २०८३
  • Saturday, 21 November, 2026
  • X

क्यानाडामा सन् २०२६ मा आगन्तुक भिसा स्वीकृति १०.६ प्रतिशतले बढ्यो

नेपालTouch
बुधबार मङ्सिर ३, २०८३ | Wednesday November 18,2026

अन्टारियो। क्यानाडाले सन् २०२६ को पहिलो आठ महिनामा ८ लाख १६ हजार ७४५ वटा आगन्तुक भिसा स्वीकृत गरेको छ। यो अघिल्लो वर्षको सोही अवधिको तुलनामा १०.६ प्रतिशतले बढी हो।

आप्रवासन, शरणार्थी तथा नागरिकता विभाग (आईआरसीसी) को तथ्यांकअनुसार सन् २०२५ को जनवरीदेखि अगस्टसम्म ७ लाख ३८ हजार ५६५ वटा आगन्तुक भिसा स्वीकृत भएका थिए।

तर भिसा स्वीकृतिको संख्या बढे पनि यो सन् २०२४ को सोही अवधिको तुलनामा अझै करिब २४ प्रतिशत कम छ। सन् २०२४ को पहिलो आठ महिनामा १० लाख ८० हजार ४२० वटा आगन्तुक भिसा स्वीकृत भएका थिए। यसले सन् २०२५ मा घटेको भिसा स्वीकृतिमा आंशिक सुधार भएको देखाउँछ।

देशअनुसार भने भिसा स्वीकृतिको अवस्था फरक छ। सन् २०२६ को पहिलो आठ महिनामा भारतीय नागरिकका लागि २ लाख ५२ हजार १४५ वटा भिसा स्वीकृत भएका छन्।

यो अघिल्लो वर्षको सोही अवधिको तुलनामा २०.८ प्रतिशत बढी हो। चीनका नागरिकका लागि १ लाख ४१ हजार ९०० वटा भिसा स्वीकृत भएका छन्। यो संख्या अघिल्लो वर्षको तुलनामा सामान्य रूपमा घटेको छ।

पाकिस्तानी नागरिकका लागि स्वीकृत भिसा २४.५ प्रतिशतले बढेर १९ हजार ३१५ पुगेको छ। युक्रेनका नागरिकका लागि स्वीकृत भिसा ८२.२ प्रतिशतले बढेर २७ हजार ४० पुगेको छ भने अल्जेरियाका नागरिकका लागि ३८.९ प्रतिशतले बढेर १६ हजार १६५ पुगेको छ।

यसको विपरीत नाइजेरियाली नागरिकका लागि स्वीकृत भिसा २३.७ प्रतिशतले घटेर २६ हजार २१० मा झरेको छ। फिलिपिन्सका नागरिकका लागि भने २.१ प्रतिशतको सामान्य वृद्धि हुँदै १५ हजार ५५५ वटा भिसा स्वीकृत भएका छन्।

आईआरसीसीको तथ्यांकले भिसा स्वीकृतिको संख्या देखाए पनि आवेदन दिएका सबैमध्ये कति प्रतिशत स्वीकृत भए भन्ने दर भने देखाउँदैन।

कुनै देशका नागरिकका लागि धेरै भिसा स्वीकृत हुनुको अर्थ त्यहाँका आवेदकको भिसा लाग्ने सम्भावना बढी हुनु होइन। आवेदनको संख्या र प्रशोधन भएका फाइलको संख्याले पनि स्वीकृतिमा प्रभाव पार्छ।

छुट्टै संसदीय विवरणअनुसार सन् २०२६ को जनवरी र फेब्रुअरीमा आगन्तुक भिसा स्वीकृति दर ५२ प्रतिशत थियो। अघिल्लो वर्षको सोही अवधिमा यो दर ४६ प्रतिशत थियो। तर यो दुई महिनाको तथ्यांक भएकाले यसलाई वर्षभरि वा सबै देशका आवेदकमा समान रूपमा लागू गर्न मिल्दैन।

आईआरसीसीले भ्रमणको उद्देश्य, आर्थिक अवस्था, आवेदकको आफ्नो देशसँगको सम्बन्ध र क्यानाडामा बस्न दिइएको अवधि सकिएपछि फर्किने आधारलगायत विषय हेरेर आवेदनको मूल्यांकन गर्छ। त्यसैले भिसा स्वीकृतिको समग्र संख्या बढ्दैमा व्यक्तिगत आवेदन स्वीकृत हुने सुनिश्चित हुँदैन।

 

तपाईंको प्रतिक्रिया