अनलाइन बाल यौन शोषणविरुद्ध कारबाहीः ६३ जना पक्राउ, २१३ मुद्दा दर्ता

नेपालTouch

बिहीबार श्रावण ७, २०८३ | Thursday July 23,2026

अन्टारियो। क्यानाडाको अन्टारियो प्रान्तमा अनलाइनमार्फत हुने बाल यौन शोषण र दुर्व्यवहारविरुद्ध चलाइएको विशेष अभियानका क्रममा ६३ जना पक्राउ परेका छन्।

अन्टारियो प्रान्तीय प्रहरी (ओपिपी) र २५ वटा स्थानीय प्रहरी सेवाको संयुक्त पहलमा सञ्चालित ‘प्रोजेक्ट टाइम’ नाम दिइएको अभियानअन्तर्गत उनीहरूविरुद्ध २१३ वटा आपराधिक मुद्दा दर्ता गरिएको हो।

अनुसन्धान अधिकारीहरूले बाल यौन दुर्व्यवहारसम्बन्धी सामग्री निर्माण, भण्डारण र वितरणमा संलग्न व्यक्तिहरूलाई लक्षित गरी २६४ वटा आपराधिक अनुसन्धान अघि बढाएका थिए।

यस कारबाहीका क्रममा ५१ जना पीडित बालबालिकाको पहिचान गरी उनीहरूलाई सुरक्षित बनाइएको र आवश्यक सहयोग उपलब्ध गराइएको प्रहरीले जनाएको छ।

प्रहरीका अनुसार गिरफ्तार गरिएकाहरू १५ देखि ७९ वर्ष उमेर समूहका छन्। पक्राउ परेकामध्ये दुई जना समाजमा जिम्मेवार तथा विश्वासिलो पदमा रहेका व्यक्ति हुन् भने आठ जना पहिले पनि यस्तै अपराधमा संलग्न दोहोरिएका कसुरदार रहेको खुलेको छ। प्रहरीले कारबाहीका क्रममा ८१४ वटा इलेक्ट्रोनिक उपकरणहरू जफत गरेको छ।

यस प्रकरणमा अझै १५४ वटा अनुसन्धान जारी रहेको प्रहरीले जनाएको छ। अनलाइन बाल यौन शोषणका घटनाहरू पछिल्ला वर्षहरूमा उल्लेख्य रूपमा बढिरहेकाले बालबालिकालाई सुरक्षित राख्न अभिभावक, शिक्षक, सङ्घसंस्था र प्रविधि कम्पनीहरूले पनि दायित्व पूरा गर्नुपर्नेमा प्रहरीले जोड दिएको छ।