क्यानाडामा सुस्तायो गाडी बजार, टोयोटा र होन्डा अगाडि

अन्टारियो। सन २०२६ को पहिलो ६ महिनामा क्यानाडामा नयाँ गाडीको बिक्रीमा कमी आएको छ। अघिल्लो वर्ष सन् २०२५ मा कोभिड महामारीयताकै सर्वाधिक बिक्री दर्ता भएको भए पनि यस वर्षको सुरुआती ६ महिनामा बजारको गति सुस्त देखिएको छ।

अटोमोटिभ न्युज र डेस्रोसियर्स अटोमोटिभ कन्सल्टेन्टका अनुसार गत वर्षको सोही अवधिको तुलनामा नयाँ गाडीको बिक्री १ देखि ३ प्रतिशतसम्म घटेको छ, जुन करिब २६ हजार थान कम हो।

भन्सार महसुल र आपूर्ति शृङ्खलामा परेको असरका कारण क्यानाडामा सर्वाधिक बिक्री हुने १० प्रमुख ब्रान्डमध्ये सातवटाको व्यापार खस्किएको छ।

सुबारुको बिक्री १२ प्रतिशत र माज्दाको १४ प्रतिशतले घटेको छ। निसानको बिक्री १५ प्रतिशतले ओरालो लाग्दै ४९ हजार ३ सय ४२ मा सीमित भएको छ।

होन्डाको बिक्री ७ प्रतिशतले घटेर ६४ हजार ९ सय ६८ पुगेको छ भने सेभ्रोले ३ प्रतिशतले घट्दै ७७ हजार ५ सय १४ मा झरेको छ।

बजारमा समग्र गिरावट आए पनि टोयोटा र हुन्डाईले भने आफ्नो उपस्थिति बलियो बनाएका छन्। टोयोटा ११ लाख ३ हजार १ सय ५५ थान गाडी बिक्री गर्दै ७ प्रतिशतको वृद्धिसहित शीर्ष स्थानमा कायम छ।

टोयोटाको चर्चित मोडल आरएभी-४ को बिक्री आपूर्ति समस्याका कारण ३३ प्रतिशतले घटे पनि टाकोमा, क्याम्री र प्रियस जस्ता मोडलको माग उच्च रहँदा समग्र वृद्धि सम्भव भएको हो।

हुन्डाई १ प्रतिशतको मामूली वृद्धिसहित ७५ हजार १ सय ३२ थान गाडी बिक्री गरी तेस्रो स्थानमा छ।

क्यानाडाको पिकअप ट्रक बजारमा जिएमसी सिर्रा र सेभ्रोले सिल्भराडोको जोडी ५७ हजार २ सय २३ थान बिक्रीसहित पहिलो स्थानमा छन्।

यद्यपि, गत वर्षको तुलनामा यो बिक्री १२ प्रतिशतले घटेको हो। २५ हजार ३ सय ६७ थान बिक्री गर्दै र्‍याम पिकअप दोस्रो स्थानमा छ। त्यस्तै, ३९ प्रतिशतको फराकिलो वृद्धिसहित ८ हजार ८ सय ९४ थान बिक्री गरेर टोयोटा टाकोमा तेस्रो स्थानमा उक्लिएको छ।

एसयुभी खण्डमा होन्डा सिआर-भी २९ हजार ३ सय ८५ थान बिक्रीका साथ शीर्ष स्थानमा छ। क्यानाडामा निर्मित यो मोडलको बिक्री ५ प्रतिशतले घटे पनि टोयोटा आरएभी-४ लाई पछि पार्दै पहिलो स्थान ओगट्न सफल भएको हो।

टोयोटा आरएभी-४ २७ हजार ८ सय २२ थानसहित दोस्रो स्थानमा छ भने हुन्डाई टुकसन २५ हजार ३ सय ८० थान बिक्री गर्दै तेस्रो स्थानमा छ। टुकसनको बिक्रीमा ३५ प्रतिशतको ठूलो उछाल आएको छ।

कार खण्डमा क्यानाडामा उत्पादित होन्डा सिभिक १६ हजार ८ सय थान बिक्रीसहित शीर्ष स्थानमा कायम छ। यद्यपि, सिभिकको बिक्री पनि ५ प्रतिशतले घटेको छ।

दोस्रो स्थानमा रहेको टोयोटा कोरोला १४ हजार ३ सय ९३ थान बिक्री भई ७ प्रतिशतको वृद्धि दर्ता गर्न सफल भएको छ।

तेस्रो स्थानमा रहेको हुन्डाई एलान्त्रा १२ हजार ५ सय ६९ थान बिक्री भएको छ। क्यानाडाको कुल नयाँ गाडी बिक्रीमा कारको हिस्सा १३ प्रतिशतमा सीमित छ।

सम्बन्धित खबर

टोरन्टोको बिली बिशप विमानस्थल विस्तारमा अटवाको रोक

'क्यानाडामा खुसी रहन वार्षिक १५५,८५० डलर आम्दानी आवश्यक पर्ने'

५ अर्ब डलरको ठेक्का अन्तिम चरणमा: ब्राम्पटनको गाडी निर्माता अटाउने सम्भावना