क्यानाडामा घर बिक्री २.३ प्रतिशतले घट्यो, औसत मूल्य पनि ओरालो

नेपालTouch

सोमबार कार्तिक ३, २०८३ | Monday October 19,2026

अन्टारियो। क्यानाडामा घरजग्गाको कारोबार सेप्टेम्बरमा लगातार दोस्रो महिना घटेको छ। बढ्दो धितो कर्जाको ब्याजदर र केन्द्रीय बैंकले ब्याजदर बढाउन सक्ने अपेक्षाका कारण घर खरिद गर्नेहरूको गतिविधि सुस्ताएको क्यानाडाली घरजग्गा संघ (सीआरईए) ले जनाएको छ।

संघका अनुसार सेप्टेम्बरमा घर बिक्री अगस्टको तुलनामा २.३ प्रतिशतले घटेको छ। अगस्टमा पनि घर बिक्री ०.७ प्रतिशतले घटेको थियो। मौसमी प्रभाव समायोजन नगरिएको तथ्याङ्कअनुसार गत वर्षको सेप्टेम्बरको तुलनामा यस वर्ष कारोबार ७.७ प्रतिशत कम भएको छ।

घरजग्गाको मूल्यमा पनि गिरावट देखिएको छ। संघको घर मूल्य सूचकाङ्क सेप्टेम्बरमा अगस्टको तुलनामा ०.४ प्रतिशतले घटेको छ। गत वर्षको सोही महिनाको तुलनामा यो सूचकाङ्क ३.४ प्रतिशतले कम हो। सन् २०२६ को सेप्टेम्बरमा क्यानाडामा घरको औसत बिक्री मूल्य ६ लाख ६६ हजार ५३८ क्यानाडेली डलर रहेको छ। यो गत वर्षको सोही महिनाको तुलनामा १.६ प्रतिशत कम हो।

अगस्टमा केही सुधार देखिएको बिक्रीका लागि नयाँ घरको सूची सेप्टेम्बरमा पुनः घटेको छ। संघका अनुसार एक महिनाको अवधिमा नयाँ सूचीमा राखिएका घरको सङ्ख्या १.८ प्रतिशतले कम भएको छ।

सेप्टेम्बरको अन्त्यसम्म क्यानाडाभर बिक्रीका लागि सूचीकृत घरको सङ्ख्या दुई लाखभन्दा केही बढी थियो। यो गत वर्षको सोही समयको तुलनामा १.८ प्रतिशत बढी हो। घरको उपलब्धता मापन गर्ने सूचकअनुसार सेप्टेम्बरको अन्त्यमा बजारमा रहेको मौज्दात बिक्रीको वर्तमान गतिमा सकिन ४.९ महिना लाग्ने देखिएको छ। यो दीर्घकालीन औसतसँग मिल्दोजुल्दो हो।

घर बिक्री र नयाँ सूचीको अनुपात सेप्टेम्बरमा ४८.८ प्रतिशतमा झरेको छ। अगस्टमा यो अनुपात ४९.१ प्रतिशत थियो। यसको दीर्घकालीन औसत ५४.७ प्रतिशत छ। संघका अनुसार ४५ देखि ६५ प्रतिशतसम्मको अनुपातलाई सामान्यतया सन्तुलित घरजग्गा बजारको सङ्केत मानिन्छ।

क्यानाडाली घरजग्गा संघका वरिष्ठ अर्थशास्त्री शन क्याथकार्टले स्थिर ब्याजदरका धितो कर्जाको ब्याजदर पछिल्लो समय बढेकाले घरजग्गा बजारमा सुस्ती आउनु अप्रत्याशित नभएको बताए। उनका अनुसार क्यानाडाको केन्द्रीय बैंकले सन् २०२६ को अन्त्यअघि ब्याजदर बढाउन सक्ने अपेक्षा व्यापक बनेको छ।

घरको मूल्य पहिले नै धेरै मानिसको पहुँचबाहिर रहेको अवस्थामा मुद्रास्फीति नियन्त्रण गर्न केन्द्रीय बैंकले ब्याजदर कति बढाउनुपर्ने हो भन्ने स्पष्ट नभएसम्म अन्योल कायम रहने र त्यसले सम्भावित घर खरिदकर्तालाई निर्णयबाट पछि हटाउन सक्ने क्याथकार्टले बताएका छन्।

क्यानाडाको केन्द्रीय बैंकले अक्टोबर २८ मा गर्ने अर्को मौद्रिक नीतिसम्बन्धी घोषणामा ब्याजदर बढाउने अपेक्षा गरिएको छैन। तर, वित्तीय बजारमा डिसेम्बरमा ब्याजदर ०.२५ प्रतिशत बिन्दुले बढ्न सक्ने अनुमान गरिएको छ।

क्यानाडाली घरजग्गा संघका अध्यक्ष ग्यारी भौराले बढ्दो ब्याजदरले घर खरिदकर्ताका लागि धितो कर्जा लिन कठिन बनाउने भए पनि बजारमा छनोटका लागि थप घर उपलब्ध हुन सक्ने र खरिदकर्ताको मोलमोलाइ गर्ने क्षमता बढ्न सक्ने बताए। उनका अनुसार घर बिक्री गर्न चाहनेहरूले मूल्य निर्धारण गर्दा बजारको अवस्थालाई ध्यान दिनुपर्नेछ।

संघको अर्को मासिक घरजग्गा तथ्याङ्क प्रतिवेदन नोभेम्बर १७ मा सार्वजनिक हुनेछ।