टोरन्टोमा कर छुटका लागि आवेदन खुला

अन्टारियो। क्यानाडाको अन्टारियो प्रान्तमा नोभेम्बर २०२६ देखि केही नयाँ नियम लागू हुँदैछन्। यसअन्तर्गत प्रान्तका उत्तरपश्चिमी केही क्षेत्रमा समय परिवर्तनसम्बन्धी नियम फेरिनेछ भने टोरन्टोमा सम्पत्ति कर तथा उपयोगिता शुल्कमा राहत लिन चाहनेहरूका लागि आवेदन दिने समयसीमा नजिकिएको छ।

अन्टारियो सरकारले मनिटोबासँग समय मिलाउँदै आएको उत्तरपश्चिमी क्षेत्रका केही समुदायमा डेलाइट सेभिङ टाइम अर्थात् गर्मीयाममा घडीको समय एक घण्टा अगाडि सार्ने व्यवस्था स्थायी बनाउने निर्णय गरेको छ। यो परिवर्तन नोभेम्बर १ देखि लागू गर्ने तयारी छ।

यस निर्णयबाट केनोरा र मनिटोबासँग ऐतिहासिक रूपमा एउटै समयअनुसार चल्दै आएका उत्तरपश्चिमी अन्टारियोका केही क्षेत्र प्रभावित हुनेछन्। सरकारले स्थानीय समुदायसँग परामर्श गरेपछि यो निर्णय लिएको जनाएको छ।

नयाँ नियम लागू भएपछि ती क्षेत्रका बासिन्दाले नोभेम्बर १ मा जाडोयामका लागि घडी एक घण्टा पछाडि सार्नुपर्ने छैन। यसबाट परिवार, व्यवसाय र आदिवासी समुदायको दैनिक जीवनमा समय परिवर्तनका कारण हुने असहजता कम हुने अपेक्षा गरिएको छ।

अन्टारियोको केन्द्रीय समय क्षेत्र ९०औँ देशान्तर रेखाको पश्चिमतर्फबाट सुरु हुन्छ। उक्त रेखा प्रान्तको उत्तरपश्चिमी भाग हुँदै जान्छ। यस क्षेत्रका पश्चिमतर्फका समुदायले जाडोयाममा पनि प्रान्तका अन्य भागसँग समयको तालमेल कायम राख्नेछन्। पूर्वी समय क्षेत्रमा पर्ने समुदायमा भने वर्षमा दुई पटक घडीको समय परिवर्तन गर्ने व्यवस्था यथावत् रहनेछ।

यसैबीच, टोरन्टोमा न्यून आय भएका ज्येष्ठ नागरिक तथा अपाङ्गता भएका न्यून आयका व्यक्तिलाई सम्पत्ति कर र उपयोगिता शुल्कमा राहत दिने कार्यक्रमका लागि आवेदन दिने समयसीमा नोभेम्बर २ मा सकिँदैछ।

सहरले घरधनीलाई आर्थिक भार कम गर्न सम्पत्ति कर वृद्धि स्थगन कार्यक्रम, पानीको शुल्कमा छुट, ठोस फोहोर व्यवस्थापन शुल्कमा छुट तथा सम्पत्ति कर वृद्धि रद्द गर्ने कार्यक्रम सञ्चालन गर्दै आएको छ। यी कार्यक्रमबाट योग्य घरधनीले आवास खर्च व्यवस्थापन गर्न सहयोग पाउनेछन्।

कार्यक्रमअनुसार उमेर, आम्दानी र अपाङ्गताको अवस्थालगायतका आधारमा योग्यता निर्धारण गरिन्छ। सन् २०२६ का लागि उपलब्ध यी राहत कार्यक्रमबाट लाभ लिन चाहने योग्य व्यक्तिले नोभेम्बर २, सोमबारभित्र आवेदन दिनुपर्नेछ।

टोरन्टोका घरधनीले खाली घर करसम्बन्धी घोषणाको समयतालिकामा पनि ध्यान दिनुपर्नेछ। सहरले सामान्यतया नोभेम्बरको सुरुवातदेखि आवासीय सम्पत्तिको अवस्था घोषणा गर्न अनलाइन प्रणाली खोल्ने गर्छ। घर खाली राख्नुको सट्टा भाडामा दिन वा बिक्री गर्न प्रोत्साहित गर्दै आवासको उपलब्धता बढाउने उद्देश्यले यो कर लागू गरिएको हो।

अघिल्लो पात्रो वर्षमा छ महिनाभन्दा बढी समय खाली रहेका टोरन्टोका सम्पत्तिमा यो कर लागू हुन सक्छ। तर घरधनीको मुख्य बसोबास भएको घर, योग्य बासिन्दाले प्रयोग गरेको सम्पत्ति वा छुट पाउने अवस्थाका सम्पत्तिमा कर नलाग्न सक्छ।

सम्पत्तिका मालिकको मृत्यु, दीर्घकालीन उपचार वा अस्पताल भर्ना, अनुमति लिएर भइरहेको ठूलो मर्मतसम्भार, अदालतको आदेशका कारण बसोबास गर्न नपाइने अवस्था तथा भाडावाल वा योग्य परिवारका सदस्यले सम्पत्ति प्रयोग गरिरहेको अवस्थालाई सम्भावित छुटका आधारमा समेटिएको छ।

सहरले तोकेको समयमा सम्पत्तिको अवस्था घोषणा नगरेमा उक्त घर खाली रहेको ठहर हुन सक्छ र त्यसमा खाली घर कर लगाइने सम्भावना रहन्छ। सामान्यतया घोषणा गर्ने अनलाइन प्रणाली खुलेपछि अर्को वर्षको अप्रिल अन्त्यसम्म विवरण बुझाउन सकिने व्यवस्था छ।

सम्बन्धित खबर

क्यानाडामा घर बिक्री २.३ प्रतिशतले घट्यो, औसत मूल्य पनि ओरालो

माइक्रोसफ्टका सफ्टवेयरमा क्यानाडा सरकारको ४४ करोड डलर खर्च

क्यानाडामा विद्युतीय गाडीको बिक्री बढ्यो, सरकारी लक्ष्य भेट्न चुनौती