चराको बसाइँसराइ पछ्याउँदै ३० हजार किलोमिटरको साइकल यात्रा

अल्बर्टा । क्यानाडाको अल्बर्टा विश्वविद्यालयका वातावरण वैज्ञानिक डा. टिम डोबर्ट र साहसिक खेलाडी लियाना क्यारियर चराको बसाइँसराइ पछ्याउँदै ३० हजार किलोमिटर लामो साइकल यात्रामा निस्कने भएका छन्।

'विङ्स अफ सर्भाइभल' नाम दिइएको यो अभियान अन्तर्गत उनीहरूले उत्तरी अमेरिकाको अलास्कादेखि दक्षिण अमेरिकाको चिलीस्थित पटागोनियाको टिएरा डेल फ्युगोसम्मको दूरी साइकलबाटै तय गर्नेछन्।

करिब नौ महिना लाग्ने अनुमान गरिएको यो ऐतिहासिक यात्रा संकटमा परेको 'हडसोनियन विम्ब्रेला' नामक जलपक्षीको वार्षिक बसाइँसराइको मार्गमा आधारित छ।

विश्वव्यापी रूपमा कुनै चरा प्रजातिको बसाइँसराइको बाटो पछ्याउँदै मानिसले शारीरिक रूपमा साइकलमार्फत यात्रा गर्न लागेको यो सम्भवतः पहिलो पटक हो।

'बर्ड्स क्यानाडा'का अनुसार सन् १९७० को दशकयता वासस्थान विनाशका कारण हडसोनियन विम्ब्रेला चराको जनसंख्या ७० प्रतिशतभन्दा बढीले घटिसकेको छ।

यो चरा हरेक वर्ष प्रजननका लागि दक्षिण अमेरिकाबाट क्यानाडा र अलास्काको उत्तरी तटसम्म हजारौँ किलोमिटर उडेर आउने गर्छ। यस चराको यात्रा, व्यवहार र जीवनरक्षाका चुनौतीहरूबारे अध्ययन गर्नु यस अभियानको मुख्य उद्देश्य रहेको छ।

यस अभियानमार्फत चराको अध्ययनका साथै मानव शरीर र मानसिक क्षमताको पनि परीक्षण गरिनेछ। लामो समयसम्मको शारीरिक तथा मानसिक थकान र वातावरणमा आएको परिवर्तनले मानव शरीरमा पार्ने प्रभावबारे वैज्ञानिक अध्ययन गरिने वैज्ञानिक डोबर्टले बताएका छन्।

यस अनुसन्धानमा अल्बर्टा विश्वविद्यालय, वेस्टर्न विश्वविद्यालय तथा चिलीका अनुसन्धानकर्ताहरू सहकार्य गरिरहेका छन्।

साइकल यात्रीहरूले आफ्नो बाटोमा पर्ने विद्यालय र स्थानीय समुदायहरूसँग वातावरण संरक्षणका विषयमा छलफल गर्ने कार्यक्रम बनाएका छन्।

क्यानाडाको भ्यान्कुभर नजिकै रहेको फ्रेजर रिभर क्षेत्र उनीहरूको मुख्य रोकिने स्थानमध्ये एक हुनेछ, जहाँ हरेक वर्ष ठूलो संख्यामा बसाइँसराइ गर्ने चराहरू भेला हुने गर्छन्।

यात्राका क्रममा विद्यार्थीहरूलाई डिजिटल नक्सामार्फत साइकल यात्री र चराहरूको प्रगति पछ्याउने सुविधा मिलाइएको छ।

यसअघि डोबर्ट र क्यारियरले यो चुनौतीपूर्ण यात्राको पूर्वतयारी स्वरूप क्यानाडाभरि साइकल यात्रा गरिसकेका छन्। वातावरण संरक्षण र मानव स्वास्थ्यबीचको गहिरो सम्बन्धलाई आममानिससमक्ष पुर्‍याउनु नै आफूहरूको मुख्य लक्ष्य रहेको उनीहरूको भनाइ छ।

सम्बन्धित खबर

उपल्लो मुस्ताङको ढोका थुनिँदा खुलेको दुम्बा तालको झ्याल

टोरन्टो-क्यालगरी हवाई भाडामा ७० प्रतिशतभन्दा बढीको वृद्धि, ह्यालिफ्याक्स मात्रै सस्तो

नेपालको सुरक्षा अवस्थामा सुधार: क्यानेडियन ट्राभल एडभाइजरी