टोरन्टो-क्यालगरी हवाई भाडामा ७० प्रतिशतभन्दा बढीको वृद्धि, ह्यालिफ्याक्स मात्रै सस्तो

टोरन्टो । हिजोआज क्यानाडाभित्रको आन्तरिक हवाई यात्रा निकै महँगो बन्दै गएको छ, जसका कारण यात्रुहरूले विगतको तुलनामा झण्डै दोब्बर भाडा तिर्नुपर्ने अवस्था सिर्जना भएको छ। पछिल्लो तथ्यांकअनुसार देशका प्रमुख सहरहरूका लागि हुने उडान शुल्कमा औसतमा १५८ डलरसम्मको वृद्धि देखिएको छ, जुन गत वर्षको तुलनामा करिब ७० प्रतिशतको ठूलो उछाल हो।

विशेष गरी भ्यान्कुवरका लागि हुने उडानमा ११६ प्रतिशत र क्यालगरी जस्ता सहरहरूका लागि हवाई भाडामा ७० प्रतिशतभन्दा बढीको वृद्धि देखिएको छ।

यसरी भाडा बढ्नुको मुख्य कारण विश्व बजारमा इन्धनको मूल्यमा भएको भारी वृद्धि र ग्रीष्मकालीन बिदाका कारण बढेको मागलाई मानिएको छ, जसले अन्टारियो र अल्बर्टा जस्ता प्रान्तहरूका यात्रुलाई प्रत्यक्ष असर पारेको छ।

इन्धनको मूल्य बढेसँगै एयर क्यानाडा र वेस्टजेट जस्ता ठूला वायुसेवा कम्पनीहरूले आफ्ना टिकटमा २५ देखि ६० डलरसम्म इन्धन अतिरिक्त शुल्क थपेका छन्। भ्यान्कुवरको औसत हवाई भाडा १९१ डलरबाट बढेर ४१३ डलर पुगेको छ भने मन्ट्रियल र राजधानी अटवाका लागि हुने उडानहरू पनि पहिलेको तुलनामा निकै महँगो भएका छन्।

यस्तै चाप एडमन्टन जाने उडानहरूमा पनि देखिएको छ। हवाई यात्राका विज्ञहरूका अनुसार इरानमा जारी द्वन्द्वका कारण इन्धनको मूल्यमा आएको उतारचढाव र अन्तर्राष्ट्रिय अस्थिरताले गर्दा यो वर्ष सस्तो उडान पाउनु चुनौतीपूर्ण बनेको छ। यद्यपि, अन्तर्राष्ट्रिय उडानको मूल्यमा भने आन्तरिकको तुलनामा केही कम अर्थात् १२ प्रतिशतको मात्र वृद्धि देखिएको छ।

देशभर हवाई भाडा आकाशिए पनि क्यानाडाको एउटा गन्तव्य ह्यालिफ्याक्समा भने उल्टो प्रवृत्ति देखिएको छ। नोभा स्कोसियाको यो प्रमुख सहरका लागि हुने उडान शुल्कमा यस वर्ष १० प्रतिशतको गिरावट आएको छ। गत वर्षको अप्रिलमा औसत ३५० डलर रहेको यहाँको भाडा अहिले घटेर ३१५ डलरमा झरेको छ।

ट्राभल सर्च इन्जिन कायाकका अनुसार अन्य सहरको तुलनामा ह्यालिफ्याक्स जान सस्तो हुनु यात्रीहरूका लागि राहतको विषय बनेको छ। विज्ञहरूले यात्रुहरूलाई उच्च मूल्यबाट बच्न निकै अगाडि नै टिकट बुकिङ गर्न र भाडाको उतारचढावलाई नजिकबाट नियाल्न सुझाव दिएका छन्।

'द नेशनल पोस्ट' का अनुसार हवाई क्षेत्रमा देखिएको यो मूल्य वृद्धिले क्यानाडालीहरूको आन्तरिक भ्रमण योजनामा ठूलो फेरबदल ल्याउन सक्ने देखिएको छ। विशेष गरी परिवारसँग बिदा मनाउन जानेहरूका लागि यातायात खर्च धान्नै नसक्ने गरी बढेको रिपोर्टमा उल्लेख छ।

यो परिस्थिति कहिलेसम्म कायम रहन्छ भन्ने कुरा विश्वव्यापी इन्धन आपूर्ति र मुद्रास्फीतिको दरमा निर्भर रहने विशेषज्ञहरूको विश्लेषण छ।

सम्बन्धित खबर

चराको बसाइँसराइ पछ्याउँदै ३० हजार किलोमिटरको साइकल यात्रा

उपल्लो मुस्ताङको ढोका थुनिँदा खुलेको दुम्बा तालको झ्याल

नेपालको सुरक्षा अवस्थामा सुधार: क्यानेडियन ट्राभल एडभाइजरी