.jpeg)
'क्यानाडाका युवामा जातीय र धार्मिक समूहलाई सामूहिक दोषी ठान्ने प्रवृत्ति बढी'
नेपालTouch
अन्टारियो । क्यानडामा बहुसंख्यक नागरिकहरू कुनै पनि धार्मिक वा जातीय समूहमाथि सामूहिक दोषारोपण गर्ने सोचको विपक्षमा रहे पनि युवा पुस्तामा भने यस्तो धारणा स्वीकार गर्ने प्रवृत्ति उच्च पाइएको छ। एसोसिएसन फर क्यानेडियन स्टडिजले हालै सार्वजनिक गरेको नयाँ जनमत सर्वेक्षणले यस्तो तथ्य उजागर गरेको हो।
अध्ययन अनुसार ५७ प्रतिशत क्यानेडियनहरूले कुनै निश्चित धर्मका मान्यताहरू हानिकारक हुन्छन् भन्नु पूर्ण रूपमा अस्वीकार्य ठानेका छन्। तर १८ देखि २४ वर्ष उमेर समूहका युवाहरूमा भने ५६ प्रतिशतले यस्तो विचारलाई कुनै न कुनै रूपमा स्वीकारयोग्य मानेका छन्, जुन अन्य उमेर समूहको तुलनामा निकै फरक दृश्य हो।
त्यस्तै, कुनै निश्चित जातीय वा धार्मिक समुदायका व्यक्तिहरूलाई विश्वास गर्न सकिँदैन भन्ने भनाइलाई करिब ६९ प्रतिशत क्यानेडियनले अस्वीकार गरेका छन्। तर क्यानडाका सबैभन्दा युवा उमेर समूहका ४२ प्रतिशत मानिसहरू यस्तो धारणाप्रति सहमत देखिएका छन्।
विदेशमा रहेका सरकारका गतिविधिका लागि क्यानडामा रहेका कुनै धार्मिक समूहका सदस्यहरूलाई सामूहिक रूपमा जिम्मेवार ठहराउने विषयमा पनि तीन-चौथाई अर्थात् ७५ प्रतिशत क्यानेडियनहरूले असहमति जनाएका छन्। यद्यपि, २५ वर्षमुनिका करिब ३२ प्रतिशत युवाहरूले यस्तो सामूहिक दायित्वको विचारलाई सहज रूपमा लिएका छन्। २५ देखि ३४ वर्ष उमेर समूहका ३० प्रतिशत र ४५ देखि ५५ वर्ष उमेर समूहका ३१ प्रतिशत नागरिकले पनि यस्तो सामूहिक दोषारोपणलाई स्वीकारयोग्य मानेका छन्, जुन राष्ट्रिय औसत २५ प्रतिशतभन्दा बढी हो।
मानिसहरूले व्यक्ति र विदेशी घटनाक्रमबीच कसरी सम्बन्ध जोड्छन् भन्ने विषयमा गहन विचार र संवेदनशीलता अपनाउनुपर्ने आवश्यकता रहेको एसोसिएसन फर क्यानेडियन स्टडिजका अध्यक्ष ज्याक जेडवाबले बताएका छन्। क्यानडा जस्तो लोकतान्त्रिक मुलुकमा यस्तो प्रवृत्तिको विकास हुनु चिन्ताजनक रहेको उनको भनाइ छ।
अध्ययनले क्यानेडियनहरूले कुन-कुन धार्मिक वा जातीय समुदायबाट सार्वजनिक रूपमा स्पष्टीकरण वा खण्डनको अपेक्षा गर्छन् भन्ने विषयमा पनि अध्ययन गरेको थियो। सर्वेक्षण अनुसार ४३ प्रतिशत उत्तरदाताहरूले इस्लाम धर्मका नाममा हुने आतङ्कवादी घटनाको क्यानडामा रहेका मुस्लिमहरूले सार्वजनिक रूपमा भर्त्सना गर्नुपर्ने अपेक्षा राखेको पाइयो।
यसैगरी, ३६ प्रतिशतले रुसी मूलका क्यानेडियनहरूले रुसी सरकारका निर्णयहरूको सार्वजनिक रूपमा विरोध गर्नुपर्ने र ३२ प्रतिशतले यहुदी मूलका क्यानेडियनहरूले इजरायली सरकारका नीतिको विरोध गर्नुपर्ने सोच राखेको देखिएको छ।
जेडवाबका अनुसार विदेशी सरकार वा समूहका गतिविधिमा कुनै नियन्त्रण वा भूमिका नभएका क्यानडाका धार्मिक तथा जातीय अल्पसंख्यकहरूलाई दोष दिनु वा सार्वजनिक रूपमा जवाफदेही बनाउन खोज्नु अभिव्यक्ति स्वतन्त्रताको विषय नभई अभिव्यक्ति स्वतन्त्रतामाथिकै खतरा हो।
लेजर नामक अध्ययन संस्थाले एसोसिएसन फर क्यानेडियन स्टडिजका लागि गत सेप्टेम्बर ४ देखि ६ सम्म १ हजार ५ सय ३८ जना क्यानेडियन नागरिकहरूमाझ यो सर्वेक्षण सञ्चालन गरेको थियो।
.gif)
सम्बन्धित खबर
.png)
तपाईंको प्रतिक्रिया