क्यानाडामा अब पासपोर्ट नवीकरणलाई घरबाटै आवेदन दिन सकिने 

अन्टारियो ।  क्यानाडा सरकारले देशभरका योग्य वयस्क नागरिकका लागि अनलाइन प्रणालीमार्फत पासपोर्ट नवीकरण गर्ने सेवा पूर्ण रूपमा सञ्चालनमा ल्याएको छ। अध्यागमन, शरणार्थी र नागरिकता मन्त्री लीना दियाबले भ्यान्कुभरमा आयोजित पत्रकार सम्मेलनमा अनलाइन पासपोर्ट नवीकरण सेवा अब सबै योग्य नागरिकका लागि खुला गरिएको घोषणा गरेकी हुन्।

यसअघि दैनिक दुई हजार आवेदनको सीमा तोकेर परीक्षणका रूपमा सञ्चालन गरिएको यो सेवामा अब कोटा प्रणाली पूर्ण रूपमा हटाइएको छ। यो निर्णयसँगै क्यानाडामा बसोबास गर्ने नेपाली मूलका क्यानेडियन नागरिकसहित अन्य सर्वसाधारणले सर्भिस क्यानाडाका कार्यालयमा घण्टौंसम्म लाइनमा बस्नुपर्ने वा कागजात हुलाकमार्फत पठाउनुपर्ने बाध्यता हटेको छ।

अनलाइन माध्यमबाट पासपोर्ट नवीकरण गर्नका लागि आवेदक हाल क्यानाडाभित्रै बसोबास गरेको हुनुपर्नेछ। यसका साथै, पछिल्लो पासपोर्ट जारी हुँदा आवेदकको उमेर १६ वर्ष वा सोभन्दा बढी भएको हुनुपर्ने र उक्त पासपोर्ट जारी भएको १५ वर्ष नकटेको हुनुपर्ने प्रावधान राखिएको छ।

आवेदन प्रक्रिया पूरा गर्नका लागि व्यावसायिक फोटोग्राफरले खिचेको डिजिटल पासपोर्ट फोटो र आवश्यक कागजात अध्यागमन, शरणार्थी र नागरिकता क्यानाडा (आइआरसिसी) को नयाँ पोर्टलमा अपलोड गर्नुपर्छ। डिजिटल माध्यमबाटै शुल्क भुक्तानी गर्न सकिने भएकाले आवेदकले आफ्ना मूल कागजातहरू आफैंसँग सुरक्षित राख्न सक्नेछन्।

अध्यागमन मन्त्री दियाबका अनुसार अनलाइन आवेदन दिएपछि नयाँ पासपोर्ट जारी हुन २० कार्यदिनको समय लाग्नेछ, जसमा डेलिभरीको करिब पाँच दिन जोडिनेछ। आवेदकहरूले आफ्नो आवेदनको प्रगतिबारे प्रणालीमार्फत प्रत्यक्ष जानकारी (रियल-टाइम अपडेट) प्राप्त गर्न सक्नेछन्। यदि सरकारले ३० कार्यदिनभित्र पासपोर्ट प्रशोधन गर्न नसकेमा आवेदन शुल्क फिर्ता गरिने नियमसमेत कायम छ।

यो सुविधा हाल १६ वर्षमुनिका बालबालिका र क्यानाडाबाहिर रहेका नागरिकका लागि भने उपलब्ध छैन। यद्यपि, भविष्यमा समीक्षा गर्दै बालबालिका र विदेशमा रहेका क्यानेडियनहरूका लागि पनि यो सेवा विस्तार गर्न सकिने सम्भावनालाई मन्त्री दियाबले अस्वीकार गरेकी छैनन्।

सरकारले यस वर्ष देशभरबाट करिब ४६ लाख पासपोर्ट आवेदन पर्ने अनुमान गरेको छ, जसमध्ये करिब ६० प्रतिशत नवीकरणका हुनेछन्। नयाँ अनलाइन प्रणालीले सर्भिस क्यानाडाका भौतिक कार्यालयहरूमा हुने भिडभाड उल्लेख्य रूपमा घटाउने अपेक्षा गरिएको छ। अनलाइन सेवा प्रयोग गर्न नचाहने वा नसक्ने नागरिकका लागि सशरीर उपस्थित भएर वा हुलाकमार्फत आवेदन दिने पुरानै विकल्पहरू पनि यथावत् राखिएका छन्।

सम्बन्धित खबर

क्यानाडामा नयाँ प्रविधिको साना आणविक रियाक्टर निर्माण तीव्रता

अमेरिकामा 'भिसा बन्ड' : ५० देशका नागरिकले २० हजार डलर धरौटी राख्नुपर्ने

ल सोसाइटी अफ अन्टारियो भन्छ, 'ऋण फिर्ता गर्न पूर्व सांसदले शर्त राखे'