क्यानाडामा आप्रवासनप्रतिको नकारात्मक धारणा घट्दै

अन्टारियो। क्यानाडामा आप्रवासीको सङ्ख्या आवश्यकताभन्दा बढी भएको ठान्ने नागरिकको अनुपात घटेको छ।

नयाँ सर्वेक्षणअनुसार, एट्लान्टिक क्षेत्र र प्रेरी प्रान्तका बासिन्दा आप्रवासीको सङ्ख्या धेरै भएको ठान्नेमा अगाडि छन् भने ब्रिटिस कोलम्बिया र क्युबेकका बासिन्दामा यस्तो धारणा कम देखिएको छ।

क्यानाडाली अध्ययनसम्बन्धी संस्थाका लागि 'ईकोस'ले गरेको सर्वेक्षणमा सहभागी ४५ प्रतिशतले देशमा धेरै आप्रवासी आइरहेको बताएका छन्।

३१ प्रतिशतले आप्रवासीको सङ्ख्या उचित रहेको र १३ प्रतिशतले अझै आप्रवासी आवश्यक रहेको धारणा व्यक्त गरेका छन्।

संस्थाका अध्यक्ष ज्याक जेडवाबका अनुसार, आप्रवासीको सङ्ख्या धेरै भएको ठान्ने नागरिकको अनुपात अझै ठूलो छ। तर विगत तीन वर्षको तुलनामा आप्रवासनबारे नागरिकको धारणा केही बदलिएको र चिन्ता घट्दै गएको उनले बताए।

म्यानिटोबा र सास्काचेवानका ५२ प्रतिशत उत्तरदाताले क्यानाडामा आप्रवासीको सङ्ख्या धेरै भएको बताएका छन्। एट्लान्टिक क्यानाडामा यस्तो धारणा राख्ने ५० प्रतिशत छन्। अल्बर्टा र अन्टारियोमा यो अनुपात समान ४६ प्रतिशत छ।

ब्रिटिस कोलम्बियामा भने ३९ प्रतिशतले मात्र आप्रवासीको सङ्ख्या धेरै भएको बताएका छन्। क्युबेकमा यस्तो धारणा राख्ने ४० प्रतिशत छन्।

आप्रवासीको सङ्ख्या उचित रहेको बताउनेमा ब्रिटिस कोलम्बियाका बासिन्दा सबैभन्दा धेरै छन्। त्यहाँका ३४ प्रतिशतले यस्तो धारणा व्यक्त गरेका छन्।

अल्बर्टा र क्युबेकमा यो अनुपात ३२–३२ प्रतिशत छ। म्यानिटोबा र सास्काचेवानमा भने २६ प्रतिशतले मात्र आप्रवासीको सङ्ख्या उचित रहेको बताएका छन्।

क्यानाडामा अझै आप्रवासी आवश्यक रहेको बताउनेमा पनि ब्रिटिस कोलम्बियाका बासिन्दा अगाडि छन्। त्यहाँ १८ प्रतिशतले यस्तो धारणा राखेका छन्। क्युबेकमा १६ प्रतिशत, एट्लान्टिक क्षेत्रमा १३ प्रतिशत र अन्टारियोमा १२ प्रतिशतले थप आप्रवासी आवश्यक रहेको बताएका छन्।

सर्वेक्षणअनुसार, आप्रवासनबारे चिन्ता सबै प्रान्तमा घटेको छ। सन् २०२५ मार्चमा देशमा धेरै आप्रवासी आएको बताउनेको अनुपात ५८ प्रतिशत थियो।

पछिल्लो सर्वेक्षणमा यो घटेर ४५ प्रतिशतमा झरेको छ। एट्लान्टिक क्षेत्रमा यस्तो धारणा राख्नेको अनुपात ५८ बाट घटेर ५० प्रतिशत पुगेको छ।

ब्रिटिस कोलम्बियामा ५६ बाट घटेर ३९ प्रतिशत र क्युबेकमा ५८ बाट घटेर ४० प्रतिशत भएको छ।

क्यानाडाका विभिन्न समुदायबीच सामाजिक एकता कायम राख्न साझा मूल्य आवश्यक रहेको धारणा पनि सर्वेक्षणमा देखिएको छ। देशभरका ३९ प्रतिशत उत्तरदाताले यसमा पूर्ण सहमति जनाएका छन् भने ४४ प्रतिशतले केही हदसम्म सहमति जनाएका छन्।

साझा मूल्य आवश्यक रहेको कुरामा क्युबेकका बासिन्दा सबैभन्दा बढी सहमत देखिएका छन्। त्यहाँ ४२ प्रतिशतले पूर्ण सहमति र थप ४२ प्रतिशतले आंशिक सहमति जनाएका छन्।

यद्यपि, सामाजिक एकताका लागि फरक मूल्य र मान्यता भएका मानिसलाई स्वीकार गर्नुपर्ने धारणा पनि व्यापक छ। देशभर ४० प्रतिशतले यसमा पूर्ण सहमति र ३९ प्रतिशतले आंशिक सहमति जनाएका छन्।

आप्रवासी धेरै भएको ठान्ने उत्तरदातामध्ये ८९ प्रतिशतले सामाजिक एकताका लागि साझा मूल्य आवश्यक रहेको बताएका छन्।

यही समूहका ६४ प्रतिशतले फरक मूल्य र मान्यता भएका मानिसलाई स्वीकार गर्नु पनि आवश्यक रहेको बताएका छन्।

संस्थाका अध्यक्ष जेडवाबका अनुसार, साझा मूल्यमा जोड दिने मानिस आप्रवासीको सङ्ख्या धेरै भएको ठान्ने सम्भावना बढी छ।

फरक मूल्य र मान्यता स्वीकार गर्नुपर्ने धारणा राख्नेहरू भने आप्रवासीको सङ्ख्या उचित रहेको वा अझै बढाउनुपर्ने पक्षमा बढी देखिएका छन्।

आप्रवासनबारे धारणा र क्यानाडाप्रतिको भावनात्मक सम्बन्धबीच पनि सम्बन्ध देखिएको छ। देशमा आप्रवासी धेरै भएको ठान्नेहरूमध्ये ५१ प्रतिशतले आफू क्यानाडासँग निकै नजिकको सम्बन्ध महसुस गर्ने बताएका छन्। आप्रवासीको सङ्ख्या उचित रहेको ठान्नेमा यस्तो अनुपात ७० प्रतिशत छ।

क्यानाडामै जन्मिएका नागरिकको तुलनामा विदेशमा जन्मिएका बासिन्दाले आप्रवासीको सङ्ख्या धेरै भएको ठान्ने सम्भावना कम देखिएको छ।

क्यानाडामा जन्मिएका ४७ प्रतिशतले आप्रवासी धेरै भएको बताएका छन् भने विदेशमा जन्मिएका बासिन्दामध्ये यस्तो धारणा राख्ने ३५ प्रतिशत छन्।

क्यानाडामा जन्मिएका ३१ प्रतिशतले आप्रवासीको सङ्ख्या उचित रहेको र १२ प्रतिशतले अझै आप्रवासी आवश्यक रहेको बताएका छन्। विदेशमा जन्मिएका उत्तरदातामध्ये क्रमशः २९ र २० प्रतिशतले यस्तो धारणा राखेका छन्।

जेडवाबका अनुसार, आप्रवासनप्रतिको नकारात्मक धारणा केही नरम हुनुमा आप्रवासी समुदायभित्रको चिन्ता घट्नु पनि एउटा कारण हुन सक्छ।

ईकोसको प्रोबिट अनुसन्धान प्यानलमार्फत अक्टोबर ९ देखि १५ सम्म १ हजार २२२ जना क्यानाडाली वयस्कमाझ अनलाइन सर्वेक्षण गरिएको थियो।

प्रधानमन्त्री मार्क कार्नी नेतृत्वको लिबरल सरकारले आगामी तीन वर्षका लागि आप्रवासनको लक्ष्य घोषणा गर्ने तयारी गरिरहेका बेला सर्वेक्षणको नतिजा सार्वजनिक भएको हो।

सरकारले नोभेम्बर ५ मा बजेट प्रस्तुत गर्नुअघि आप्रवासनसम्बन्धी नयाँ लक्ष्य सार्वजनिक गर्ने अपेक्षा गरिएको छ।

सम्बन्धित खबर

टोरन्टोबाट तीन छोराछोरीसहित सम्पर्कविहीन भएकी महिला खोज्दै प्रहरी

अल्बर्टाको जनमतसंग्रहमा आप्रवासन र संविधानका विषय प्रमुख

अन्टारियोमा घरबारविहीन समस्या नयाँ नगर नेतृत्वका लागि चुनौती