.jpeg)
दक्षिण अफ्रिकी मानवअधिकारवादी नाभी पिल्लेलाई नोबेल शान्ति पुरस्कार
नेपालTouch
अन्टारियो। दक्षिण अफ्रिकी मानवअधिकार कानुन व्यवसायी नवनितेम नाभी पिल्लेलाई सन् २०२६ को नोबेल शान्ति पुरस्कार प्रदान गरिएको छ।
नर्वेजियन नोबेल समितिका अनुसार रङ्गभेदकारी शासनविरुद्धको संघर्ष, शान्ति स्थापना र अन्तर्राष्ट्रिय कानुनको प्रवर्द्धनमा पुर्याएको योगदानका लागि उनलाई यो पुरस्कार प्रदान गरिएको हो।
समितिले नाभी पिल्लेले असाधारण साहस र निष्ठाका साथ विश्वव्यापी कानुनी व्यवस्थाको विकासमा योगदान पुर्याएको उल्लेख गरेको छ। युद्ध अपराध, मानवताविरुद्धका अपराध र नरसंहारका घटनामा दोषीमाथि मुद्दा चलाउने व्यवस्था सुनिश्चित गर्न उनले महत्त्वपूर्ण भूमिका खेलेको समितिको भनाइ छ।
दक्षिण अफ्रिकाको डर्बनमा रङ्गभेदको समयमा भारतीय तमिल मूलको परिवारमा जन्मिएकी पिल्लेले संरचनात्मक भेदभाव, पृथकीकरण र बहिष्करणको सामना गर्दै कानुनी क्षेत्रमा आफ्नो पहिचान स्थापित गरेकी हुन्।
उनले रङ्गभेदविरुद्ध संघर्ष गर्ने नेल्सन मण्डेलालगायतका व्यक्तिको पक्षमा वकालत गर्दै आफ्नो कानुनी यात्रा सुरु गरेकी थिइन्। त्यसपछि अन्तर्राष्ट्रिय न्यायिक निकायहरूमा न्यायाधीशका रूपमा काम गर्दै मानवअधिकार र अन्तर्राष्ट्रिय न्यायको क्षेत्रमा योगदान पुर्याइन्।
पिल्लेले दक्षिण अफ्रिकाको उच्च अदालत, रुवान्डाका लागि गठित अन्तर्राष्ट्रिय फौजदारी न्यायाधिकरण र अन्तर्राष्ट्रिय फौजदारी अदालतमा न्यायाधीशका रूपमा काम गरिसकेकी छन्।
उनी संयुक्त राष्ट्रसङ्घको मानवअधिकारसम्बन्धी उच्चायुक्तसमेत बनेकी थिइन्। पछिल्लो समय उनले प्यालेस्टिनी भूभागसम्बन्धी संयुक्त राष्ट्रसङ्घको स्वतन्त्र अन्तर्राष्ट्रिय अनुसन्धान आयोगको अध्यक्षता गरेकी थिइन्।
हाल उनी म्यानमारविरुद्ध नरसंहारको आरोपसम्बन्धी मुद्दा हेरिरहेको अन्तर्राष्ट्रिय न्यायालयमा न्यायाधीशका रूपमा कार्यरत छिन्।
.gif)
सम्बन्धित खबर
.png)
.png)
तपाईंको प्रतिक्रिया