तेन्जिङ नोर्गेको कथा अब पर्दामा: चलचित्र 'तेन्जिङ' टोरन्टोमा प्रिमियर

टोरन्टो । सगरमाथाको पहिलो सफल आरोहणका ऐतिहासिक नायक तेन्जिङ नोर्गे शेर्पाको जीवनीमा आधारित चलचित्र 'तेन्जिङ' निर्माण भएको छ।

सन् १९५३ मे २९ मा न्युजिल्यान्डका एडमन्ड हिलारीसँगै सगरमाथाको चुचुरोमा पुगेका शेर्पाको योगदान र जीवनयात्रालाई केन्द्रमा राखेर यो चलचित्र तयार पारिएको हो।

टोरन्टो अन्तर्राष्ट्रिय चलचित्र महोत्सवमा प्रदर्शन गरिएको २ घण्टा ५ मिनेट लामो यस चलचित्रले इतिहासमा छायामा पारिएका शेर्पाको भूमिकालाई मुख्य प्राथमिकता दिएको छ।

सगरमाथाको चुचुरोमा मानव पाइला परेको पहिलो तस्बिर तेन्जिङ नोर्गेकै थियो। एडमन्ड हिलारीले खिचेको उक्त तस्बिरमा शेर्पाले हातमा बरफ काट्ने बन्चरो समातेका छन्, जसमा बेलायत, नेपाल, संयुक्त राष्ट्रसङ्घ र भारतका झन्डा फर्फराइरहेका देखिन्छन्। तर, त्यस ऐतिहासिक सफलतापछि सार्वजनिक वृत्त र विश्वव्यापी सञ्चारमाध्यममा हिलारीलाई मुख्य नायकका रूपमा प्रस्तुत गरियो भने शेर्पाको योगदानलाई ओझेलमा पारियो।

यसै ऐतिहासिक तथ्यलाई सच्याउँदै चलचित्र 'तेन्जिङ' ले सगरमाथा आरोहणको वास्तविक कथा र तेन्जिङ नोर्गेको सङ्घर्षलाई पर्दामा उतारेको छ।

अस्ट्रेलियाली निर्देशिका जेनिफर पिडमको निर्देशनमा बनेको यस चलचित्रमा तेन्जिङ नोर्गेको मुख्य भूमिका तिब्बती-नेपाली मूलका अभिनेता गेन्देन फुन्त्सोकले निर्वाह गरेका छन्।

यस्तै, एडमन्ड हिलारीको भूमिकामा टम हिडल्स्टन र बेलायती अभियान टोलीका नेता जोन हन्टको भूमिकामा विलेम डाफो देखिएका छन्। चलचित्रमा क्याट्रिओना बाल्फ, थिन्ले ल्हामो र तेन्जिङ डाल्हाको पनि महत्त्वपूर्ण अभिनय रहेको छ।

अस्ट्रेलिया र न्युजिल्यान्डका हिमाली क्षेत्रका साथै नेपालका वास्तविक स्थानहरूमा छायाङ्कन गरिएको यस चलचित्रले शेर्पा समुदायको साहस, हिमाली जीवनको जोखिम र तत्कालीन बेलायती अभियान टोलीभित्रको औपनिवेशिक विभेदलाई प्रस्तुत गरेको छ। टोरन्टो प्रिमियरपछि चलचित्र समीक्षक र दर्शकहरूले यसको निर्माण पक्ष र ऐतिहासिक दृष्टिकोणको उच्च प्रशंसा गरेका छन्।

विशेष गरी क्यानाडा तथा उत्तर अमेरिकामा बसोबास गर्ने नेपाली समुदायका लागि यो चलचित्र विशेष चासोको विषय बनेको छ। टोरन्टो प्रिमियरमा सहभागी नेपाली दर्शकहरूले इतिहासमा ओझेलमा पारिएका आफ्ना राष्ट्रिय नायकको कथा हलिउड स्तरको चलचित्रमार्फत विश्वसामु पुगेकोमा खुसी व्यक्त गरेका छन्।

सगरमाथा आरोहणको ७३ वर्षपछि प्रदर्शनका लागि तयार भएको यो चलचित्रले तेन्जिङ नोर्गे र सम्पूर्ण शेर्पा समुदायको अतुलनीय योगदानलाई अन्तर्राष्ट्रिय स्तरमा स्थापित गराउने अपेक्षा गरिएको छ।

सम्बन्धित खबर

टोरन्टो फिल्म फेस्टिभलमा 'एलिफेन्ट्स इन द फग' को नर्थ अमेरिकन प्रिमियर

'कन्दरा'को अमेरिकी कन्सर्टबाट बाढीपीडितलाई २१ लाख

क्यानाडामा ‘स्वर बादल सरी टुर २०२६’ हुँदै